مقال النهاردة من أهم المقالات اللي تخص الكيندل .. لإنه بيتكلم عن موضوع يهم كل المستخدمين وهو ( البطارية )
كتير جداً بعد ما تشتري جهازك .. سواء جديد أو مستعمل .. وتبتدي تستخدمه وإنت ف دماغك فكرة مسبقة عن بطارية الكيندل إنها أسطورية، وبتستمر الشحنة الواحدة لشهر كامل !، وتلاقي بعد ما تنقل كتبك وتعمل أكاونتك وتظبط دنيتك إن البطارية رايحة ف داهية، وبتسيب الجهاز 100% تيجي تمسكه تلاقيه 85% ولا حاجة ! .. وتيجي تقرا شوية تلاقي نزل ل 60% ف ساعتين ! ف يبتدي بقي الفار يلعب ف عبك خصوصاً لو الجهاز مستعمل وتقول أنا اتضحك عليا، ف كفاية مقدمات ونتكلم ف المهم عشان تفهم إيه اللي بيحصل.
هنتكلم عن حاجة اسمها Kindle Indexing ..
ببساطة، في كل مرة بتضيف كتاب للكيندل، هيقوم نظام تشغيل الكيندل بعمل Indexing ليه، يعني فهرسته، هو ده أساس وظيفة البحث علي الجهاز، وده بيحصل لكل كتاب بينزل علي الكيندل، سوء حملته متجر أمازون نفسه، أو بعته بالميل، أو نقلته بالكابل من الكمبيوتر.
عملية الفهرسة دي أكثر العمليات الحسابية كثافة اللي بيمر بيها الكيندل، وكل ما زاد عدد الكتب اللي ضيفتها مرة واحدة، كل ما استغرقت العملية وقت أطول، ممكن فهرسة كتاب واحد تستنفد قدر معقول من وقت وعمر البطارية، لكن عند إضافة عشرات أو مئات الكتب مرة واحدة، يزيد وقت الفهرسة لجهازك، وممكن نقل عدد كبير من الكتب يستغرق أيام ف الفهرسة ويقلل من عمر البطارية بشكل جذري.
ف لو انت بتخطط إنك تنقل عدد كبير من الكتب علي جهازك، من الأفضل إنك تعمل ده أثناء شحن الجهاز، ولو الموضوع ده مش مُلح يعني أوي بالنسبالك ف الأفضل إنك تنقل الكتب علي دفعات أقل من 10 ف المرة الواحدة.
ف لو اشتريت جهاز جديد أو مستعمل وحصل معاك كدا بعد ما نقلت الكتب .. هتصبر كام يوم كدا ومع تاني او تالت شحنة هتلاقي البطارية اتظبطت وادتك الأداء المثالي اللي انت بتدور عليه، وكمان فيه حاجات هتساعد علي زيادة وقت البطارية أكتر، زي تقليل الإضاءة أو قفلها طالما مش محتاجها وقاعد ف مكان مضئ، وقفل الواي فاي وتفعيل وضع الطيران طالما مش بتسخدم الانترنت.
